Ven Meemure-Dhammawansa පුජ්ය මීමුරේ ධම්මවංස හිමි කල දේසනා

Ranjith Daluwatta

(5 stars; 5 reviews)

Dhamma Talks by Ven Meemure Dhammawansha Thero are quite different to most run of the mill talks heard in Sri Lanka. Ven Dhammawansa Thero Ven Meemure Dhammawansa has gained a remarkable following in Sri Lanka.  Venerable Meemure Dhammawansha Thero's temple is Sri Punodaramaya at Pussellawa, Kegalle.  Address: Sri Punyodharamaya Temple , Pussella , Kegalle , Sri Lanka. PHONE: +94 35 222 3746 E MAIL: venerable.dhammawanshathero@gmail.com   බෙලිගල මීමුරේ ගම්මානයේ ජී.ආර්. පොඩිරාළහාමි හා ජී.ආර්. මැණික්හාමි යන දෙමාව්පියනට දාව පළමු දරුවා ලෙස 1954. 11. 29 වැනිදා එළිය දුටු ලයනල් විජේරත්න නමැති පින්වත් දරුවා අනාගතයේ දිනක ගෞතම සම්මා සම්බුද්ධ ශාසනය බබුළුවන උතුම් සඟරුවනක් වන බව කවුරුත් දැන සිටියේ නැත. ඔහුගේ පියා සමූපකාර කළමනාකරුවකු වශයෙන් අවිවේකි ජීවිතයක් ගත කර ඇත. ඔහුගේ මව සැදැහැවත් බෞද්ධ උපාසිකාවක් වූවාය. සිය සිඟිති පුතු ද රැගෙන පන්සල් යන ඇය මල්පහන් පූජා කොට හාමුදුරුවන් බැහැදැක වැඳ පුදා එන්නීය. වසර සියයකට පසුව සම්බුද්ධ ශාසනයේ උදා වන දුර්ලභ අවස්ථාවක් වූ වර්ෂ 2500 සම්බුද්ධ ජයන්තිය සැමරීම සඳහා අනුරාධපුරයේ පැවැති උත්සවයකට වයස අවුරුදු දෙකක් සම්පූර්ණ වූ සිය පුතු ද සමඟ සහභාගී වීම තුළින් තෙරුවන් කෙරෙහි ඇයගේ ඇති ගෞරවය හා ශ්‍රද්ධාව පෙන්නුම් කෙරිණි. එවන් බෞද්ධ පසුබිමක් තුළ හැදුණු වැඩුණු ලයනල් විජේරත්න දරුවා ප්‍රාථමික අධ්‍යාපනය හදාරනුයේ කන්දේ ගෙදර මහා විද්‍යාලයේදීය. ද්විතීයික අධ්‍යාපනය සඳහා ඇතුළු වීමේ විභාගයෙන් සමත් වී නාරම්මල මයුරපාද මධ්‍ය මහා විද්‍යාලයට ඇතුළු වූ අතර උසස් අධ්‍යාපනය සඳහා විද්‍යා විෂය ධාරාව හැදෑරීම සඳහා බෝධිරාජ මහා විද්‍යාලයට ඇතුලත් විය. එහි අවසන් විභාගයෙන් පසුව මෙම අධ්‍යාපනයේ හරයක් නැති බවත් ජීවිතයේ හිස් බවත් අඩුවක් ඇති බවත් දැනුණු අතර ජීවිතයට සැනසීම ලබා ගැනීමට නම් තවත් මඟක් තිබිය යුතු බවත් සිතන්නට පෙළඹුණි. විවාහ ජීවිතයක් පිළිබඳ සිහිනය නොපෙනෙන අනාගතයකට භාර කළ මොහුට එක්තරා තරුණ හාමුදුරු නමක් විසින් දේශනා කරන ලද ධර්ම දේශනයක් ශ්‍රවණය කරන්නට ලැබීමත් සමඟම මොහුගේ ජීවිතය සුවිශේෂී සන්ධිස්ථානයක් කරා යොමු වන්නට විය. එහි ප්‍රතිඵලයක් ලෙස පැවිදි ජීවිතයක් ඇරඹීමට තමා තුළ ඇති වූ කැමැත්ත සංසාරගත පුරුද්දක් විය හැකි මුත් පළමුවෙන්ම සිය මෑණියන්ට ප්‍රකාශ කළේය. එයට ඇය ඉතා සතුටින් එකහෙලාම කැමැත්ත හා අවසරය දෙනු ලබන්නේ සිය ජීවිත කාලයේ දී පුතකු බුද්ධ ශාසනයට පූජා කිරීමට ඇයගේ සිත තුළ බලවත් සිහිනයක් තිබූ බව පෙන්නුම් කරමණි. එහෙත් පියාගේ දැඩි සෙනෙහස නිසා වැඩිමල් පුතු ශාසනයට ඇතුළු වීමෙන් අනාරක්ෂිත බවක් නුහුරු පරිසරයක, රාත්‍රියට ආහාරපවා නොලැබීමෙන් දුකට පත්වේය යන චේතනාවෙන් ඊට අකමැත්ත ප්‍රකාශ කළත් පසුව අවසර ලබා දුන්නේය. එතෙක් ලයනල් විජේරත්න නම් වූ පින්වත් කුමරා සියඹලාපිටියේ බුද්ධරක්ඛිත හා ගල්අතර ධම්මරක්ඛිත හාමුදුරුවන් යටතේ 1981 ඔක්තෝම්බර් 8 වැනිදා බෙලිගල මීපේ ධම්මාවංශ යන නමින් පැවිදි භූමියට ඇතුළත් කරනු ලැබීය. පසුව කෑගල්ල, පුස්සැල්ල පුණ්‍යෝද්‍යාරාමයේ ගෞරවනීය විහාරාධිපතීත්වය දැරූ සියඹලාපිටිය ධම්මානන්ද හාමුදුරුවන්ගේ ශිෂ්‍යභාවය ලබා ගත් උන්වහන්සේ 1989 වර්ෂයේදී උපසම්ප්‍රදාව ද ලැබීය. උන්වහන්සේ ළමා කාලයේ සිටම පොතපත කියවීමේ පුරුද්දට දැඩිව ඇබ්බැහි වී සිටි නිසා පැවිදි වූ පසුවත් දහම් පොත්වලට අමතරව විවිධ පොත්පත් මිලදී ගනිමින් කියවීමේ පුරුද්ද අඛණ්ඩව සිදු කර ඇත. ආචාර්ය ඊ.ඩබ්. අදීකාරම් මහතාගේ පොතක තිබූ " භාවනාව යනු කුමක්ද ?" යන ලිපියද, ක්‍රිෂ්ණ මූර්ති චින්තනයේ " දකින්නා හා දකින දෙය අතර පරතරය අතුරුදහන් වීම භාවනාවයි " යන්න හා අජාන් චා  හිමියන්ගේ " චින්තනයේ අනිත්‍ය හෙවත් ධර්මය" යන්නත් කෙරෙහි  උන්වහන්සේගේ දැඩි අවධානය යොමු විය. ඒ අනුව තිලෝගුරු බුදු පියාණන්ගේ ධර්මය අඩංගු ත්‍රිපිටකය ගැඹුරින් හැදෑරීමේ ආශාව තුළින් සම්මුති සත්‍ය හා ආර්ය සත්‍ය පිළිබඳ ගවේෂණයක යෙදුණි. එම ගවේෂණය අනුව උන්වහන්සේ සමථ භාවනාවේ යෙදී සමාධිය දක්වා සිත දියුණු කලත් භාවනාවේ සිටින තාක්කල් සමාධි සුවය ඇතත් ඉන් මිදුණු පසු සමාධිය පිරිහෙන නිසාත් එය තාවකාලික සුවයක් බව උන්වහන්සේට වැටහුණි. අනතුරුව උන්වහන්සේ විදර්ශනා භාවනාව තුළින් නොපිරිහෙන ආර්ය සමාධි සුවය ලබා ගැනීම පිණිස ත්‍රිපිටකයේ ඛන්දක වග්ගය හා සලායතන වග්ගය පිළිබඳ ආර්ය ගවේෂණයට උන්වහන්සේගේ සිත පෙළඹුණි. ඒ අනුව චතුරාර්ය සත්‍ය අවබෝධ කරගත උන්වහන්සේ, දුකෙන් ගැලවීමේ පංච උපාධානය නිරුද්‍ධ කිරීම තුළින් කෙලෙස් ක්ෂය කිරීම තුළින් නිර්වාණය කරා යන විදර්ශනාව අනුගමනය කොට තණ්හාව ක්ෂය කිරීමේ සුඛය ලබා ගැනීමෙන් ආර්ය ප්‍රතිපදාව හෙවත් පටිසෝතගාමී ප්‍රතිපදාවට පිළිපන්නේය.  1996 වර්ෂයේ දී ශ්‍රී පුණ්‍යෝද්‍යාරාම විහාරස්ථානයේ විහාරාධිපතීත්වයට පත් වූ උන්වහන්සේ තම සිතැගි පරිදි යටපත්ව තිබූ ශ්‍රී ‍ සද්ධර්මය දේශනා කරන්නට පටන් ගත්තේය. අනතුරුව එළඹුණු වස් සමයේ දී තම පන්සලේ ධර්ම දේශනා 15කින් සමන්විත වූ ධර්ම දේශනා මාලාවක් පවත්වනු ලැබීය. ගමෙන් පිටතද ධර්ම දේශනා මාලාවක් පවත්වනු ලැබුවේ එක්තරා පිළිවෙළක් අනුවය. මිනිසුන්ගේ චිත්ත සන්තානය තුළ සංකල්ප වශයෙන් අල්ලා ගත් මිත්‍යා මත දුරු කරලීම තුළින් ධර්ම දේශනාවලට පිවිසෙන උන්වහන්සේ ජීවිතයට ධර්මය යන තේමාව යටතේ මිනිසුන්ගේ දුක් නිවාගැනීම පිණිස බුදුන් වහන්සේ වදාළ ශ්‍රී සද්ධර්මය දේශනා කරනු ලැබීය.  2005 වර්ෂයේ දී ජාතික රූපවාහිනියේ ධර්ම දේශනා කිරීම තුළින් සියලු ශ්‍රී ලාංකිකයන්ට උන්වහන්සේ හඳුනා ගැනීමට හැකි වූ අතර එතැන් පටන් මේ දක්වා වරින්වර ස්වාධීන රූපවාහිනිය ඔස්සේද, වී අයි පී ගුවන්විදුලිය ඔස්සේද, රන්ගිරි දඹුලු ගුවන්විදුලිය හා රූපවාහිනිය ඔස්සේද, සී. එස්. එන්. රූපවාහිනි නාළිකාව ඔස්සේද, ජාතික රූපවාහිනි නාළිකාව ඔස්සේද සෑම සෙනසුරාදාවකම විවිධ ප්‍රදේශවල ආගමික ස්ථානවල ද ධර්ම දේශනා මාලාවන් පවත්වමින් ද සිටින අතර එම දේශනා අන්තර්ජාලය ඔස්සේ ශ්‍රවණය කිරීමට ද පහසුකම් සලසා ඇත්තේය. උන් වහන්සේගේ හැම ධර්ම දේශනාවක්ම ලෝකෝත්තර අර්ථය එළිදක්වමින් අවසානයේ දුක නිවා ගන්නා මාර්ගය පෙන්වා දෙන බැවින්, එක් ධර්ම දේශනාවක් පමණක් නියමාකාරයෙන් අවබෝධ කරගත්තේ නම් ආර්ය මාර්ගයට පැමිණ නිවන් කරා යාමට අවස්ථාව උදාකර ගත හැකි වන්නේය. දැනටමත් සිය ගණනක් පිරිස උන්වහන්සේගේ ධර්ම දේශනා ශ්‍රවණය කොට තේරුම් ගෙන ආර්ය මාර්ගය ඔස්සේ ගමන් කොට තණ්හාව ක්ෂය කිරීමේ සුවය අත්විඳ හා අත්විඳිමින් සිටිති.  ඔබටත් සසරින් මිදීමේ එම දුර්ලභ අවස්ථාව උදාකර ගැනීමට කැමතිනම් උන්වහන්සේගේ ධර්ම දේශනා ශ්‍රවණය කොට ආර්ය මාර්ගයට පිවිස අවේදිත සුවය විඳගන්න.

License